Á aðalfundi HEÞ sem haldinn var 27. apríl s.l. var ákveðið að breyta lögum Hrossaræktar­samtaka Eyfirðinga og Þingeyinga (H.E.Þ.) þannig að í stað þess að samtökin séu samnefnari fyrir sjálfstæð aðildarfélög þá verður eftirleiðis um beina aðild einstaklinga að ræða.

Þessi breyting var gerð eftir langan aðdraganda og vegna þess að misvirk félög voru að hafa áhrif á starfsemi H.E.Þ.

Eins og áður geta allir sem stunda hrossarækt, eða hafa áhuga á framgangi hrossaræktar á félagssvæðinu, orðið félagar í samtökunum og inntökubeiðnir skulu bera upp til samþykktar á stjórnarfundi.

H.E.Þ. er aðili að Búnaðarsambandi Eyjafjarðar, Búnaðarsambandi S-Þingeyinga, Búnaðar­sambandi N-Þingeyinga og Félagi hrossabænda.

Félagið starfar samkvæmt búnaðarlögum, lögum um framleiðslu, verðlagningu og sölu á búvörum og samþykktum Bændasamtaka Íslands.

Með aðild að H.E.Þ. eru bændur því aðilar að Félagi hrossabænda og eru galdgengir þegar viðurkenningar til ræktunarverðlauna H.E.Þ. eru veittar svo dæmi séu nefnd.

Félag hrossabænda stendur fyrir ýmsu markaðsstarfi auk hrossaræktarmála, en helsta markaðsátakið sem nú er í gangi er átakið „Horses of Iceland”, sem H.E.Þ. tekur þátt í. Félagsmenn H.E.Þ. geta tekið þátt í átakinu í gegn um þá aðild eða með beinni aðild.

Þá er rétt að geta þess að félagsmenn H.E.Þ. fá aðgang að Worldfeng innifalið í félagsgjaldinu, en til stendur að loka aðganginum fljótlega hjá þeim sem ekki hafa borgað. Þess er þó vert að geta að félagsmenn hestamannafélaga hafa sama rétt í gegn um aðild að Landssambandi hestamannafélaga.

Greiðsluseðlar eru sendir út til þeirra sem hafa verið á félagaskrá H.E.Þ., en þar er innheimt 5.000 kr. árgjald til H.E.Þ. og 6.000 kr. árgjald til Félags hrossabænda, eða samtals 11.000 kr.

Með því að greiða gíróseðilinn staðfesta félagsmenn aðild þína að H.E.Þ., en litið verður svo á að sá sem greiðir ekki gíróseðilinn á þessu ári óski ekki eftir áframhaldandi aðild að félaginu.

Þetta hefur ekkert með sjálfstæðu hrossaræktarfélögin að gera og þau stjórna sínum málum sjálf.

Stjórnin þakkar fyrir samstarfið og býður öllum að fylgjast áfram með starfseminni hér á heimasíðu H.E.Þ.

Félag hrossabænda gaf út fréttabréf í maí.

Fréttabréfið má sjá með því að smella hér.

Á aðalfundi H.E.Þ. voru verðlaun veitt fyrir árangur félagsmanna í hrossarækt á seinasta ári.

Ákveðið deyfð hefur verið í sumum aðildarfélögum og því hefur gengið illa að halda utan um félagatal. Fyrir aðalfund voru fjögur hrossaræktarbú tilnefnd, en á aðalfundi bættust þrjú bú við. Hrossaræktarbúin sem tilnefnd voru til ræktunarverðlauna voru:

Garðshorn á Þelamörk, Gunnlaugur Atli Sigfússon á Akureyri, Laugasteinn í Svarfaðardal, Litli-Garður í Eyjafjarðarsveit, Ós í Hörgársveit, Torfunes í Þingeyjarsveit og Vignir Sigurólason á Húsavík.

Tilnefnd hrossaræktarbú

Titilinn hrossaræktarbú H.E.Þ. árið 2017 hlaut Torfunes, en hrossarækt stendur þar á sterkum grunni og sýnd voru 9 hross frá Torfunesi á árinu með aðaleinkunn 8,20 auk þriggja hryssa sem hlutu heiðursverðlaun.

Efstu hross í hverjum flokki voru:

Stóðhestar 4 vetra:

Sirkus frá Garðshorni á Þelamörk, sköpul. 8,17, hæfil. 8,71, aðaleink. 8,49, ræktendur Agnar Þór Magnússon og Birna Tryggvadóttir Thorlacius

Grani frá Torfunesi, sköpul. 8,09, hæfil. 8,35, aðaleink. 8,24, ræktandi Torfunes ehf.

Gorgeir frá Garðshorni á Þelamörk, sköpul. 8,46, hæfil. 8,71, aðaleink. 7,90, ræktendur Agnar Þór Magnússon og Birna Tryggvadóttir Thorlacius

Hryssur 4 vetra:

Stefna frá Torfunesi, sköpul. 8,33, hæfil. 8,55, aðaleink. 8,46, ræktandi Torfunes ehf.

Hylling frá Akureyri, sköpul. 7,89, hæfil. 8,30, aðaleink. 8,13, ræktandi Gunnlaugur Atli Sigfússon

Vaka frá Árgerði, sköpul. 8,35, hæfil. 7,95, aðaleink. 8,11, ræktandi Magni Kjartansson

Stóðhestar 5 vetra:

Árblakkur frá Laugasteini, sköpul. 8,09, hæfil. 8,69, aðaleink. 8,45, ræktandi Ármann Gunnarsson

Mozart frá Torfunesi, sköpul. 8,16, hæfil. 8,40, aðaleink. 8,31, ræktandi Torfunes ehf.

Börkur frá Efri-Rauðalæk, sköpul. 7,89, hæfil. 8,54, aðaleink. 8,28, ræktendur Baldvin Ari Gunnlaugsson og Ingveldur Guðmundsdóttir

Hryssur 5 vetra:

Óskastund frá Kommu, sköpul. 8,44, hæfil. 8,40, aðaleink. 8,42, ræktendur Vignir Sigurólason og Vilberg Jónsson

Eldey frá Torfunesi, sköpul. 8,31, hæfil. 8,18, aðaleink. 8,23, ræktendur Torfunes ehf. o.fl.

Efemía frá Litlu-Brekku, sköpul. 8,11, hæfil. 8,25, aðaleink. 8,19, ræktandi Vignir Sigurðsson

Stóðhestar 6 vetra:

Eðall frá Torfunesi, sköpul. 7,96, hæfil. 8,76, aðaleink. 8,44, ræktendur Torfunes o. fl.

Ísak frá Jarðbrú, sköpul. 8,13, hæfil. 8,14, aðaleink. 8,13, ræktandi Þröstur Karlsson

Bessi frá Húsavík, sköpul. 8,31, hæfil. 7,84, aðaleink. 8,03, ræktandi Vignir Sigurólason

Hryssur 6 vetra:

Glóð frá Hrafnsstöðum, sköpul. 7,74, hæfil. 8,90, aðaleink. 8,43, ræktandi Zophonías Jónmundsson

Eldborg frá Litla-Garði, sköpul. 8,18, hæfil. 8,56, aðaleink. 8,41, ræktendur Stefán Birgir Stefánsson og Herdís Ármannsdóttir

Auðlind frá Brúnum, sköpul. 8,07, hæfil. 8,56, aðaleink. 8,36, ræktandi Hákon Hákonarson

Stóðhestar 7 v. og eldri:

Hrafn frá Efri-Rauðalæk, sköpul. 8,55, hæfil. 9,03, aðaleink. 8,84, ræktendur Hjalti Halldórsson og

Petrína Sigurðardóttir

Vængur frá Grund, sköpul. 8,54, hæfil. 8,47, aðaleink. 8,50, ræktandi Friðrik Þórarinsson

Segull frá Akureyri, sköpul. 7,95, hæfil. 8,69, aðaleink. 8,40, ræktandi Gunnlaugur Atli Sigfússon

Hryssur 7 v. og eldri:

Stássa frá Ytra-Dalsgerði, sköpul. 8,02, hæfil. 8,50, aðaleink. 8,31, ræktandi Kristinn Hugason

Sigurrós frá Brúnum, sköpul. 8,20, hæfil. 8,35, aðaleink. 8,29, ræktandi Einar Gíslason

Sigrún frá Syðra-Holti, sköpul. 8,26, hæfil. 8,28, aðaleink. 8,27, ræktendur Anton Páll Níelsson og Inga María S. Jónínudóttir

Hæst dæmdakynbótahrossið aldursleiðrétti: 

Verðlaun afhent fyrir hæst dæmda kynbótahrossið

Hæst dæmda kynbótahrossið aldursleiðrétt var Hrafn frá Efri-Rauðalæk, sköpul. 8,55, hæfil. 9,03, aðaleink. 8,84, ræktendur Hjalti Halldórsson og Petrína Sigurðardóttir.

Halldór Gunnarsson tók við verðlaununum f.h. eigenda.

Aðalfundur HEÞ verður haldinn í Funaborg á Melgerðismelum fimmtudaginn 27. apríl n.k. kl. 20.

Á dagskrá eru lagabreytingar auk venjulegra aðalfundarstarfa.

Á fundinum verða jafnframt veitt verðlaun fyrir hæst dæmdu kynbótahross félagsmanna og hrossaræktarbúi HEÞ 2016 verður veitt viðurkenning. Þau bú sem hljóta tilnefningu eru:

• Ármann Gunnarsson
• Garðshorn
• Litli-Garður
• Sindri og Sverrir

Allir félagar hafa seturétt, málfrelsi og tillögurétt á aðalfundi og eru þeir hvattir til að mæta.

Stjórnin

Aðalfundur hrossaræktarfélagsins Náttfara verður haldinn í Funaborg þriðjudagskvöldið 25.apríl n.k. 20:30.

Hefðbundin aðalfundarstörf ásamt tillögu að lagabreytingum. 

Allir félagar hvattir til að mæta !

Stjórnin

Horses of Iceland býður ykkur velkomin á alþjóðlegu hestasýninguna Equitana í Essen, Þýskalandi, 18.-26. mars næstkomandi, þar sem starfsfólk okkar mun kynna íslenska hestinn á bási 2-B19. Þetta er stærsta hestasýning Evrópu, en gert er ráð fyrir um 200.000 gestum. Fjölmiðlafólki er boðið í sérstaka móttöku, sem haldin verður í básnum okkar 25. mars kl. 15:30-17:30. Þorgerður Katrín Gunnarsdóttir landbúnaðarráðherra mun halda ræðu og síðan verður boðið upp á léttar veitingar og skemmtiatriði.

Á meðan á sýningunni stendur, verður gestum boðið að koma í básinn okkar og horfa á 360-gráðu myndband af íslenska hestinum, úti í íslenskri náttúru, í sýndarveruleika; að ferðast til heimkynna íslenska hestsins. Við búumst fastlega við því að þessi upplifun muni hafa mikil áhrif á sýningargesti, einkum þá, sem aldrei hafa komið til Íslands áður.

Við munum einnig hafa tvo sjónvarpsskjái á básnum, þar sem kynningarmyndbönd um íslenska hestinn verða sýnd. Bæklingum um íslenska hestinn verður dreift á ensku og þýsku, sem og póstkortum með myndum af íslenska hestinum og upplýsingum um eiginleika hans. Gestum stendur til boða að taka þátt í getraun og hugsanlega vinna ferð til Íslands. Við munum einnig sýna auglýsingu á 60×9 m skjá í reiðhöllinni á meðan sýningar standa yfir á daginn og kvöldin.

Markaðsverkefnið Horses of Iceland

Tilgangur markaðsverkefnisins Horses of Iceland er að auka vitund um og styrkja ímynd íslenska hestsins á alþjóðavettvangi. Markmiðið er að leggja grunn að aukinni verðmætasköpun og auknum gjaldeyristekjum af sölu á hestinum, vörum og þjónustu honum tengdum með faglegu markaðsstarfi undir merkjum Horses of Iceland – bring you closer to nature. Equitana sýningin í Essen er einn af stærstu viðburðunum sem Horses of Iceland tekur þátt í árið 2017.

Við hlökkum til að sjá ykkur!

Vefsíða: www.horsesoficeland.is
Samfélagsmiðlar: Facebook, Instagram, Twitter, Pinterest, Tumblr
Jelena OhmVerkefnastjóri Horses of Iceland
jelena@islandsstofa.is
S: 895-9170

Hrossaræktarsamtök Eyfirðinga og Þingeyinga taka þátt í verkefninu „Horses of Iceland”.
Á seinasta aðalfundi HEÞ var samþykkt að taka þátt í markaðsátakinu Horses of Iceland.
Átakið er stórt átaksverkefni um kynningu á íslenska hestinum um heim allan með aðkomu ríkisins.
Íslandsstofa heldur utan um verkefnið. Fylgist með verkefninu á vef átaksins http://www.horsesoficeland.is/

Boðað er til fundar til að ræða um framtíðarfyrirkomulag HEÞ.
Sigríkur Jónsson formaður Hrossaræktarsamtaka Suðurlands mætir á fundinn og segir frá starfsemi sinna samtaka en þau byggja á einstaklingsaðild en eru ekki samtök aðildarfélaga eins og HEÞ.
Fundurinn verður haldinn í reiðhöllinni á Akureyri þriðjudaginn 14. mars kl. 20.
Fundurinn er öllum opinn og eru félagsmenn sérstaklega hvattir til að mæta og skiptast á skoðunum.

Almennur fundur í fundaröð Félags hrossabænda og Fagráðs í hrossarækt um málefni hestamanna verður haldinn í reiðhöllinni á Akureyri fimmtudaginn 2. mars kl. 20.
Helstu málefni sem tekin verða fyrir á fundunum eru m.a. eftirfarandi:

• Félagskerfi Félags hrossabænda
• Markaðsmál
• Þróun ræktunarmarkmiðs í hrossarækt og dómskala
• Nýjungar í skýrsluhaldinu
• Nýjungar í kynbótadómum

Eins og sjá má verður margt áhugavert á döfinni.
Með fulltrúum Félags hrossabænda og fagráðs, þeim Sveini Steinarssyni formanni Félags hrossabænda og fagráðs og Þorvaldi Kristjánssyni, ábyrgðarmanni í hrossarækt verður fulltrúi Landssambands hestamannafélaga og munu þau verða frummælendur fundanna.

Félagsmenn í H.E.Þ., hrossaræktendur og aðrir hestamenn eru hvattir til að fjölmenna á fundina og nýta tækifærið til að kynna sér verkefnin og leggja sitt til málanna.

Fundi sem vera átti í kvöld 19. október er frestað vegna þess að gestur fundarins Sigríkur Jónsson kemst ekki á fundinn vegna veðurs.

Reynum aftur í nóvember.

Stjórnin