Fréttatilkynning – Horses of Iceland á Equitana

Horses of Iceland býður ykkur velkomin á alþjóðlegu hestasýninguna Equitana í Essen, Þýskalandi, 18.-26. mars næstkomandi, þar sem starfsfólk okkar mun kynna íslenska hestinn á bási 2-B19. Þetta er stærsta hestasýning Evrópu, en gert er ráð fyrir um 200.000 gestum. Fjölmiðlafólki er boðið í sérstaka móttöku, sem haldin verður í básnum okkar 25. mars kl. 15:30-17:30. Þorgerður Katrín Gunnarsdóttir landbúnaðarráðherra mun halda ræðu og síðan verður boðið upp á léttar veitingar og skemmtiatriði.

Á meðan á sýningunni stendur, verður gestum boðið að koma í básinn okkar og horfa á 360-gráðu myndband af íslenska hestinum, úti í íslenskri náttúru, í sýndarveruleika; að ferðast til heimkynna íslenska hestsins. Við búumst fastlega við því að þessi upplifun muni hafa mikil áhrif á sýningargesti, einkum þá, sem aldrei hafa komið til Íslands áður.

Við munum einnig hafa tvo sjónvarpsskjái á básnum, þar sem kynningarmyndbönd um íslenska hestinn verða sýnd. Bæklingum um íslenska hestinn verður dreift á ensku og þýsku, sem og póstkortum með myndum af íslenska hestinum og upplýsingum um eiginleika hans. Gestum stendur til boða að taka þátt í getraun og hugsanlega vinna ferð til Íslands. Við munum einnig sýna auglýsingu á 60×9 m skjá í reiðhöllinni á meðan sýningar standa yfir á daginn og kvöldin.

Markaðsverkefnið Horses of Iceland

Tilgangur markaðsverkefnisins Horses of Iceland er að auka vitund um og styrkja ímynd íslenska hestsins á alþjóðavettvangi. Markmiðið er að leggja grunn að aukinni verðmætasköpun og auknum gjaldeyristekjum af sölu á hestinum, vörum og þjónustu honum tengdum með faglegu markaðsstarfi undir merkjum Horses of Iceland – bring you closer to nature. Equitana sýningin í Essen er einn af stærstu viðburðunum sem Horses of Iceland tekur þátt í árið 2017.

Við hlökkum til að sjá ykkur!

Vefsíða: www.horsesoficeland.is
Samfélagsmiðlar:
Facebook, Instagram, Twitter, Pinterest, Tumblr
Jelena OhmVerkefnastjóri Horses of Iceland
jelena@islandsstofa.is
S: 895-9170

HEÞ tekur þátt markaðsátaki

Hrossaræktarsamtök Eyfirðinga og Þingeyinga taka þátt í verkefninu „Horses of Iceland”.
Á seinasta aðalfundi HEÞ var samþykkt að taka þátt í markaðsátakinu Horses of Iceland.
Átakið er stórt átaksverkefni um kynningu á íslenska hestinum um heim allan með aðkomu ríkisins.
Íslandsstofa heldur utan um verkefnið. Fylgist með verkefninu á vef átaksins http://www.horsesoficeland.is/

Fundur um framtíðarfyrirkomulag HEÞ

Boðað er til fundar til að ræða um framtíðarfyrirkomulag HEÞ.
Sigríkur Jónsson formaður Hrossaræktarsamtaka Suðurlands mætir á fundinn og segir frá starfsemi sinna samtaka en þau byggja á einstaklingsaðild en eru ekki samtök aðildarfélaga eins og HEÞ.
Fundurinn verður haldinn í reiðhöllinni á Akureyri þriðjudaginn 14. mars kl. 20.
Fundurinn er öllum opinn og eru félagsmenn sérstaklega hvattir til að mæta og skiptast á skoðunum.

Árleg fundaherferð um málefni hestamanna

Almennur fundur í fundaröð Félags hrossabænda og Fagráðs í hrossarækt um málefni hestamanna verður haldinn í reiðhöllinni á Akureyri fimmtudaginn 2. mars kl. 20.
Helstu málefni sem tekin verða fyrir á fundunum eru m.a. eftirfarandi:

  • Félagskerfi Félags hrossabænda
  • Markaðsmál
  • Þróun ræktunarmarkmiðs í hrossarækt og dómskala
  • Nýjungar í skýrsluhaldinu
  • Nýjungar í kynbótadómum

Eins og sjá má verður margt áhugavert á döfinni.
Með fulltrúum Félags hrossabænda og fagráðs, þeim Sveini Steinarssyni formanni Félags hrossabænda og fagráðs og Þorvaldi Kristjánssyni, ábyrgðarmanni í hrossarækt verður fulltrúi Landssambands hestamannafélaga og munu þau verða frummælendur fundanna.

Félagsmenn í H.E.Þ., hrossaræktendur og aðrir hestamenn eru hvattir til að fjölmenna á fundina og nýta tækifærið til að kynna sér verkefnin og leggja sitt til málanna.

Haustfundur HEÞ

Boðað er til fundar til að ræða um framtíðarfyrirkomulag HEÞ. Sigríkur Jónsson formaður Hrossaræktarsamtaka Suðurlands mætir á fundinn og segir frá starfsemi sinna samtaka en samtökin byggja á einstaklingaðild en ekki er ekki samtök félaga eins og hjá Hrossaræktarsamtökum Eyfirðinga og Þingeyinga.
Fundurinn verður haldinn í Búgarði, Óseyri 2 á Akureyri, miðvikudaginn 19. október kl. 20.
Fundurinn er öllum opinn og eru félagsmenn sérstaklega hvattir til að mæta og skiptast á skoðunum.
Stjórnin

Markaðssetning á Landsmóti

Félag hrossabænda verður með aðstöðu á Hestatorginu og býður félagsmönnum sínum að koma með bæklinga og nafnspjöld til að láta liggja frammi á básnum.

Vinsamlegast hafið samband við Hallveigu Fróðadóttur fyrir miðvikudaginn 22.júní ef þið hafið áhuga á að nýta ykkur þennan möguleika, svo hægt verði að útvega standa og statíf við hæfi.

Félag hrossabænda – The Horse Breeders Association
Bændahöllinni við Hagatorg
107 Reykjavík
Sími: 563-0300
fhb@fhb.is

Kolskeggur frá Kjarnholtum á vegum HEÞ eftir landsmót

Kolskeggur frá Kjarnholtum I verður til afnota hjá Hrossaræktarsamtökum Eyfirðinga og Þingeyinga í einu löngu gangmáli eftir Landsmót.
Kolskeggur er með 8,73 í aðaleinkunn 2016, 8,66 fyrir byggingu og 8,77 fyrir hæfileika fyrir Landsmót. Nú þegar hefur komið fram 1 dæmt afkvæmi undan honum, Katla frá Kjarnholtum I, með 8,00 í aðaleinkunn 5 vetra.

Kolskeggur Kjarnholtum

Kolskeggur Kjarnholtum

Kolskeggur hefur hlotið þrjár 9,5, fyrir höfuð, samræmi og skeið, og fjórar 9,00, fyrir háls og herðar, bak og lend, tölt og vilja og geðslag.
Kolskeggur verður í girðingu að Höskuldsstöðum í Eyjafirði og er verð fyrir fengna hryssu kr. 160.000- með vsk., girðingargjaldi og einni sónarskoðun.

Tekið er á móti pöntunum á tölvupóstfangið jonas.vigfusson@gmail.com eða hjá Jónasi í síma 861 8286.

Katla Kjarnholtum

Katla Kjarnholtum

Konsert Kjarnholtum

Konsert Kjarnholtum

Ungfolaskoðun og DNA sýnataka

Boðið verður upp á ungfolaskoðanir og DNA-sýnatöku úr hrossum á Norðurlandi í næstu viku. Þorvaldur Kristjánsson, ábyrgðarmaður hrossaræktar, verður á ferðinni á eftirtöldum svæðum:

Skagafjörður – miðvikudagurinn 27. apríl.

Eyjafjörður- og Þingeyjarsýslur – fimmtudagurinn 28. apríl.

Húnavatnssýslur – föstudagurinn 29. apríl.

Tekið er á móti pöntunum og nánari upplýsingar gefnar í síma 892-9690 eða á netfanginu: thk@rml.is. Pantanir þurfa að berast í síðasta lagi mánudaginn 25. apríl.