Hrossaræktarsamtök Eyfirðinga og Þingeyinga
Skýrsla stjórnar og ársreikningur fyrir árið 2006 Aðalfundur í Hlíðarbæ 15. mars 2007
Stjórn
Ekki urðu breytingar á stjórn á seinasta aðalfundi. Baldvin Kr. Baldvinsson var endurkjörinn formaður til þriggja ára og Vignir Sigurólason var kosinn í stjórn í stað Þorsteins Hólm. Stjórnin er því þannig skipuð: Baldvin Kr. Baldvinsson formaður, Vignir Sigurðsson varaformaður, Vignir Sigurólason ritari, Zophonías Jónmundsson gjaldkeri og Vilberg Jónsson meðstjórnandi. Varamenn í stjórn voru kosnir Þorvar Þorsteinsson og Höskuldur Jónsson. Búgarður – Ráðgjafaþjónusta hefur svo annast ýmis störf fyrir HEÞ skv. samkomulagi. Haldnir voru 6 stjórnarfundir á árinu 2006. Fundargerðir má nálgast á heimasíðu Samtakanna, www.hryssa.is.
Stóðhestahald
Gustur frá Hóli var seinna gangmál í Rauðuskriðu. 14 hryssur reyndust fengnar skv. sónarskoðun af 30 eða 47%. Í samræmi við samþykkt síðasta aðalfundar var leitað eftir því við meðeigendur hvort til greina kæmi af þeirra hálfu að gefa eftir forkaupsrétt ef hesturinn yrði seldur til félagsmanna HEÞ. Ekki reyndist vilji fyrir því og var því horfið frá þeim áformum. Í framhaldi af því var ákveðið að óska eftir tilboðum í leigu á hestinum til allt að þriggja ára. Var þetta auglýst á helstu fréttavefum hestamanna. Eitt tilboð barst, undirritað af Vilbergi Jónssyni fyrir hönd Heimamanna og hljóðaði það upp á 4.149.585.- m.vsk. fyrir næstu 3 ár. Ákveðið var á stjórnarfundi að vísa málinu til fulltrúafundar. Þar sem ákveðið var að hafna þessu tilboði. Gustur er nú í umsjá Þorvars og Hauks á Ytri-Bægisá og verður þar á húsnotkun. Hrymur frá Hofi var seinna gangmál á Ytri-Bægisá frjósemi var þokkaleg, 22 reyndust fengnar af 30 eða 73%. Sl. vetur var hann í þjálfun hjá Sigurði Sigurðssyni í Þjóðólfshaga. Þjálfun gekk afar vel í upphafi en þegar á leið tóku sig upp eymsli í framfæti þannig að þjálfun var hætt. Gígjar frá Auðsholtshjáleigu var eftir Landsmót í löngu gangmáli á Hrafnsstöðum. Af 45 hryssum sem hjá honum voru reyndust 35 jákvæðar skv. sónarskoðun eða 78%. Gígjar var sýndur á kynbótasýningu í Glaðheimum og á Landsmóti hestamanna á Vindheimamelum, þar sem hann hlaut í aðaleinkunn 8,46 og þriðja sæti í flokki 6v. stóðhesta. Gígjar kom jafnframt fram í stóðhestakynningu á Mývatn Open. Sýnandi var Þórður Þorgeirsson. En veg og vanda að þjálfun og umsjón hafa Gunnar Arnarson og fjölskylda Auðsholtshjáleigu. Samtökin höfðu á leigu Álfastein frá Selfossi og var hann í hólfi í Víðinesi Eyjafjarðarsveit. Af 30 hryssum reyndust 19 fengnar eða 63%. Gengið hefur verið frá leigu á stóðhestinum Álfi frá Selfossi tvö gangmál sumarið 2007. Eignarhestar verða jafnframt til afnota eins og auglýst hefur verið.
Sýningarhald
Búgarður og Hrossaræktarsamtök Eyfirðinga og Þingeyinga stóðu að venju fyrir héraðssýningu kynbótahrossa og fór hún fram dagana 7.-9. júní sl. Sýningin var haldin í Hringsholti, félagssvæði hestamannafélagsins Hrings í Dalvíkurbyggð. Til dóms mættu 96 hross þar af 24 stóðhestar. Dómarar voru þau Þorvaldur Kristjánsson, Valberg Sigfússon og Herdís Reynisdóttir.
Fræðslustarf og fundir
Samtökin stóðu að venju fyrir svokölluðum Haustfundi og var hann að þessu sinni haldinn í Ljósvetningabúð í Þingeyjarsveit 2. nóvember sl. Frummælendur voru Guðlaugur Antonsson landsráðunautur í hrossarækt sem fór yfir sviðið í hrossaræktinni og Trausti Þór Guðmundsson frá Félagi tamningamanna. Mjög góð mæting var á fundinn og góðar umræður. Á fundinum voru veitt ræktunarverðlaun, sem nánar er fjallað um í næsta kafla. Félag hrossabænda og FT stóðu fyrir afar áhugaverðu námskeiði á Hólum í Hjaltadal þar sem boðið var uppá fyrirlestur í atferlisfræði hrossa, ásamt sýnikennslu í fortamningum og frumtamningum. Guðlaugur Antonsson og Kristinn Guðnason formaður FH héldu uppteknum hætti og funduðu með hestamönnum í febrúar sl. Fundurinn var haldinn í Sveinbjarnargerði og var afar vel sóttur.
Verðlaunaveitingar
5 bú voru tilnend til Ræktunarverðlauna HEÞ 2006. Það voru Árgerði, Búland, Efri-Rauðilækur, Grund II og Torfunes. Ræktunarbú ársins var valið Torfunes. Þar hefur um árabil verið stunduð farsæl hrossarækt og hafa hross frá búinu staðið sig vel í keppni og kynbótasýningum. Á árinu 2005 náði stóðhesturinn Blær frá Torfunesi þeim árangri að hljóta hæstu hæfileikaeinkunn allra stóðhesta það árið og næst hæstu aðaleinkunn. Á sl ári voru þrjú hross sýnd í kynbótadómi frá búinu og voru þau öll með yfir 8 í aðaleinkunn. Meðaleinkunn þeirra var 8,14. Stóðhesturinn Máttur frá Torfunesi hlaut í einkunn 8,24 og náði 6. sæti í flokki 4v. stóðhesta á síðasta Landsmóti. Ræktendur hæst dæmda stóðhests og hæst dæmdu hryssu á síðasta ári, á félagssvæði HEÞ, hlutu einnig sérstaka viðurkenningu. Hæst dæmdi stóðhesturinn var Hraunar frá Efri-Rauðalæk og hlaut hann í aðaleinkunn 8,41.Ræktandi er Guðlaugur Arason. Hæst dæmda hryssan var Dúsa frá Húsavík. Hún hlaut í aðaleinkun 8,40. Ræktandi Dúsu er Vignir Sigurólason.
Fréttabréf og vefur
Útgáfumál voru með svipuðu sniði og undanfarin ár. Tvö fréttabréf komu út á starfsárinu og á heimasíðunni hryssa.is má nálgast ýmsar upplýsingar um samtökin.
|